Фотоны тұрғындар өздері түсіріп, редакцияға арнайы жіберді

Себебі, Теректі, Алғабас ықшам аудандарындағы көшелерге тас жол төселмегендіктен қатты жаңбырда, күз бен көктемде жүру мүмкін емес дейді.

«Қазір көктем. Жолдың жиегіндегі барлық қар еріп, көше белуардан батпаққа айналды. Ол былай тұрсын, кейбір жерлер жарты метрге дейін шұңғырланып ішіне су жиналып қалады. Күн сайын сабаққа барған балалардың үсті-басы батпақ болып үйге келеді. Себебі, шұңқырларға су толып қалып, білінбей адамдар ішіне құлап жатыр. Кішкентай оқушылармен қатар қарияларда жүреді ғой көше бойымен. Біз солардың амандығы үшін қатты алаңдаймыз. Бұл өте қауіпті. Адам түгілі, джиппен өтудің өзі мұң», — дейді Айша есімді тұрғын.

Алатаулықтар осы мәселені 3 жыл бойы айтып жергілікті әкімдіктің табалдырығын тоздырған, алайда еш нәтиже жоқ. Асфальт жолды армандауды қойған жұртшылық тым құрымаса шұңқырларды жамап, жаяу адам жүргенге ыңғайлап берсе дейді.

Алматау әкімдігіндегілер болса, аталған проблемадан хабардармыз деп отыр.

«Алматы қаласы Автомобиль жолдары басқармасына 2014, 2015, 2016 жылдар аралығында 3 рет ұсыныс айтып, тас жол салу туралы хат жаздық. Сапалы жол салу солардың мойнында. Алайда, аталған аудандарда кәріз құбырлары мен желілері толықтай жүргізілмегендіктен тас жол салу кейінге шегеріліп отыр. Сондықтан да тұрғындарға әлі де болса шыдауларына тура келеді. Ал батпаққа айналған жолдар мен ойылған шұңқырды наурыз айының соңы мен сәуір айының басында ғана жамап, тазалайтын боламыз. Бұл жұмыс сол уақытқа жоспарланған», — деді коммуналдық шаруашылық бөлімінің бас маманы Ертіс Бейсеров.

Әкімдік қызметкерінің сөзінше, Алатау ауданындағы 5 елді мекенде көлік түгіл жаяу адам жүре алмайтын 200 шақырым жол бар екен. Олардың да қашан ретке келтіретінін шенділер дөп басып айта алмады.