Баткендегі 35524-әскери бөлімде келісім-шартпен қызмет еткен сарбаз өліміне қатысты тексеру жүріп жатыр. Бұл туралы Азаттықтың Қырғыз қызметіне бас прокуратура хабарлады.
Құзырлы мекеме мәліметінше, оқиға Баткен гарнизоны әскери прокуратурасының электронды жорналында тіркелген, тергеу алдындағы тексеру басталған.
Бұның алдында қорғаныс министрі сарбаз абайсызда өзін атып өлтірді деп мәлімдеген.
«Оқиға себебі анықталып жатыр, соған қатысты қызметтік тексеру басталды» деп хабарлады бас прокуратура.
Бас прокурор Құрманқұл Зулушевтің хабарлауынша, 2022 жылы Қырғызстан қарулы күштерінде қайтыс болған төрт сарбаздың ісі суицид деп тіркелген.
«Қылым шамы» құқық қорғау ұйымының мәліметінше, 2012-2016 жылдар аралығында армияда түрлі себептермен алпыс адам қайтыс болған. Көп жағдайда марқұмдардың туыстары сарбаз өз-өзіне қол жұмсады дегенге күмән келтірген.