Бішкектегі №61 мектептің директоры Юрий Низовский үйқамаққа шығарылды. Бұл жөнінде оның адвокаты Икрамидин Айткулов хабарлады.
«Менің оны үйқамаққа босату жөніндегі өтінішімді тергеу ісі қабылдады, сот шешім шығарды. Себебі, қазір ол науқас. Оның диагнозымен ауыратындарды әдетте абақтыда ұстамайды», — деді адвокат.
Қазір Юрий Низовскийдің үстінен «Коррупция» және «Қызметін асыра пайдалану» баптары бойынша қылмыстық іс қозғаған.
Бішкектің Бірінші май аудандық сотының шешімі бойынша, ол 16 қыркүйекке дейін үйқамақта болады.
Ол Ұлттық қауіпсіздік жөніндегі мемлекеттік комитет тарапынан оқушылардың ата-анасынан ақша алып тұратын схема құрған деген күдікпен ұсталған.
«Тергеу барысында оның және туыстарының меншігінде 35-тен астам жылжитын және жылжымайтын мүлік – жер учаскелері, коттеждер, дүкендер, көліктер, пәтерлер бар екені анықталды. Олардың жалпы сомасы 150 миллион сомға бағаланып жатыр», — делінген арнайы комитет таратқан мәліметте.