Қырғызстанның бұрынғы премьер-министрі Темір Сариев 27 мамырда Ұлттық қауіпсіздік мемлекеттік комитетінде Құмтөр ісі бойынша куәгер ретінде тергеуде болды. Мәліметті Азаттықтың қырғыз қызметіне саясаткердің өзі растады. Дегенмен ол тергеу туралы мәлімет бермеді.
ҰҚМК төрағасы Камчыбек Ташиев бұның алдында Құмтөр алтын кеніне қатысты төрт қылмыстық іс тергеуде жатқанын хабарлаған. Оның айтуынша, бірінші іске бұрынғы премьер-министр Мұхаммедкалый Абылгазиевтің қатысы бар. Ол жемқорлық жасады деген күдікке іліккен.
«Мұнда сол кезде билікте болған лауазым иелері, үкімет мүшелері көп. Депутаттар да бар», — деп мәлімдеді Ташиев. Бірақ ол шенеуніктер мен депутаттардың есімдерін атамады.
Екінші іс «Құмтөр Голд Компаниге» қатысты қозғалған. Үшінші қылмыстық іс салықтар мен сақтандыру жарналарына қатысты. Бұл іс аясында салық қызметі мен әлеуметтік қор өкілдері күдікке іліккен. Төртінші қылмыстық іс «Құмтор Голд Компани» өкілдерінің үстінен қозғалған.
17 мамырда парламент «Құмтөр» компаниясының қызметін тексеру жөніндегі мемлекеттік комиссияның есебін тыңдап, үкіметке «Құмтөр Голд Компаниге» сырттай уақытша басқару енгізуді тапсырды.
«Құмтөр Голд Компаниге» иелік ететін канадалық Centerra Gold Inc. Қырғызстан үкіметінің үстінен төрелік сотқа шағым түсірді.
Құмтөр — Қырғызстандағы ең ірі алтын кені.