Таяу уақытта «Қытай — Қырғызстан — Өзбекстан» темір жолының құрылысы басталмақ. Оның жалпы құны 6 млрд доллар деп бағаланып отыр.
Бұл жөнінде Токиода өткен Орталық Азия инвестициялық форумда Қырғызстанның үкімет басшысы Ақылбек Жапаров мәлімдеді деп хабарлайды оның баспасөз қызметі.
«Біз секілді теңізге шыға алмайтын елдерге көлік және темір жол құрылымын дамыту керек. Бізге ел экономикасына интеграция жасайтын жаңа темір жол бағыттары қажет», — деген Жапаров.
Халықаралық темір жол құрылысы келесі жылдың сәуір айында басталады деп жоспарланып отыр. Қырғызстан бірінші кезеңде жол құрылысының 20 пайызын, екінші кезеңде 10 пайызын, ал Өзбекстан 30 пайызын, үшінші кезеңде Қытай 30 пайызын төлемек. Ал төртінші кезеңде әрбір тарап теңдей қаржы құймақ.