кадр из видео
Өзбекстан Қырғызстанмен шекараға тұрғызған дуалды сүрді. Бұл жөнінде Қырғызстанның шекара қызметіне сілтеме жасап қырғызстандық БАҚ хабарлады.
Осының алдында әлеуметтік желіде Өзбекстан 2010 жылы тұрғызған дуалды сүріп жатқан видео тараған. Қырғызстан шекара қызметінің мәліметінше, бұл Қырғызстанның Жалалабад пен Өзбекстанның Әндіжан облыстары арасындағы «Бекабад-Ханабад» шекара бекеті.
Ондағы ақпаратқа қарағанда, «Бекабад-Ханабад» шекара өткізу бекетін қалпына келтіру мақсатында осыған дейін тұрғызылған дуалды сүрген. «Қырғыз тарабы аталған бекеттен азаматтарды өткізуге дайын»,- деп мәлімдеді Қырғызстан шекара қызметі.
Бұдан бөлек Қырғызстанның Ош облысы мен Өзбекстанның Әндіжан облысы арасындағы «Қарасу — Бағыш» шекара бекетін де қайтадан ашпақ.
Аталған екі шекара бекетін қалпына келтіру мәселесі екі ел арасында бірнеше жылдан бері талқыланып келеді.
Қырғызстан мен Өзбекстанның шекара қашықтығы 1314 шақырым. Былтыр қараша айында Қырғызстан мен Өзбекстан 30 жылға созылған шекараны анықтау мәселесінде нүкте қойылды деп мәлімдеген.