Өзбекстанның ІІМ аквапарктағы бишілерден ВИЧ-ке анализ алынғаны туралы Самарқанд облыстық ішкі істер басқармасының мәлімдемесін теріске шығарды.
ІІМ мәліметіне қарағанда, облыстық басқарманың баспасөз хатшысы Самарқанд ауданындағы аквапарктың ашылуында билеген қыздар тері-венерологиялық ауруларға тексеріліп, ВИЧ-ке анализ тапсыруға міндеттелгені туралы мәліметті «жағдайды толық түсінбей тұрып» жариялаған.
«Қоғам наразылығын туғызған бұл мәліметке қатысты қызметтік тексеру басталды», — деді ІІМ баспасөз хатшысы Шохрух Гиясов.
Ол ұйымдастырушылар бұхаралық шара өткізудің ережесін бұзғанын айтты.
Осының алдында әлеуметтік желілерде аквапаркте билеп жатқан қыздардың видеосы жарияланған. Самарқанд облыстық ішкі істер басқармасы «биші қыздардың тері-венерологиялық ауруларға тексеріліп, ВИЧ-ке анализ тапсырғанын» мәлімдеген. Мекеме мәлімдемесінде іс-шараны ұйымдастырушыларға қатысты тергеу жүргізіліп, аудандық сотқа берілгені жазылған.