Өзбекстан мен Қырғызстан шекараларын делимитациялау процесін аяқтап, демаркациялау мәселесіне көшті. Бұл мәселе бойынша екі елдің жұмыс тобының алғашқы кездесуі өтті деп хабарлайды Газета.уз басылымы.
Ташкентте 7 ақпанда Орталық Азия халықаралық институтының ұйымдастыруымен Өзбекстан мен Қырғызстан қарым-қатынасының стратегиялық болашағы деген тақырыпта дөңгелек үстел өтті.
Өзбекстанның сыртқы істер министрінің орынбасары Бахромжон Алоевтың сөзінше, биыл екі елдің шекарасын демаркациялау мәселесі бойынша жұмысшы топтардың алғашқы отырысы өткен. 2023 жылға кездесу кестесі түзіліп қойған.
Қаңтар айының соңында Өзбекстан мен Қырғызстан делимитациялау процесін аяқтаған.
Делимитация(лат. delіmіtatіo – шекараны анықтау) – іргелес мемлекеттер арасындағы келісім бойынша мемлекеттік шекараның орналасуы мен бағытын анықтау. Ол бұрын қабылданған өзара келісімшарттар мен карталарда көрсетілген меже бойынша жүргізіледі. Ал демаркация — осы шекараны нақты белгілеу шаралары.