Өзбекстанның Сырдария облысы Мирзаабад және Янгиер ауданында «экстремистік материал таратты» деп күдікке ілінген 20 адам ұсталды. Бұл туралы облыстың ішкі істер басқармасы Телеграмдағы парақшасында хабарлады.
Ақпаратқа қарағанда, күдіктілер 16 маусымда ішкі істер министрлігі мен мемлекеттік қауіпсіздік қызметінің біріккен операциясы кезінде ұсталған. Полицияның болжамынша, күдіктілер Телеграмда «экстремистік және террористік ұйымдарды насихаттайтын аудио және видеоматериалдар таратқан».
Өзбекстан ішкі істер министрлігінің хабарламасына тапанша және снайперлік винтовканың суреттері де тіркелген. Полиция топ мүшелерінің үйін тінткен кезде осындай қару-жарақ табылғанын айтады.
Бұған дейін 15 маусымда Жизақ облысының ішкі істер басқармасы Галлаарал ауданында Сириядағы «Қатиба Таухид уәл-Жихад» террористік тобына қосылмақ болған топтың ұсталғанын хабарлаған.
Маусым айының басында Самарқандта «Сириядағы террористік топқа қосылуды жоспарлаған» 14 адам ұсталғаны туралы ақпарат шықты.