Біріккен Ұлттар Ұйымы Бас хатшысының бірінші орынбасары Әмина Мохаммед 8-9 маусым күндері Өзбекстанда болады, деп хабарлады елдің сыртқы істер министрлігі.
Сапар кезінде Мохаммед өзбек парламенті мен жастар ісі жөніндегі агенттігінде келіссөздер жүргізіп, елдің іскер әйелдерімен кездеседі.
Әмина Мохаммедтің Орталық Азия елдеріне сапары 5 маусымда басталып, 12 маусымда аяқталады. Ол 7 маусымда Душанбеде су мәселелері жөніндегі халықаралық конференцияға қатысты. Әмина Мохаммед аймақтағы Түркіменстан, Қазақстан және Қырғызстан елдеріне де барады.
БҰҰ сайтының хабарлауынша, аймақ елдеріне сапары кезінде Әмина Мохаммед билік өкілдерімен, БҰҰ-ның аймақтағы қызметкерлерімен жүзбе-жүз кездеседі, азаматтық қоғам өкілдерімен жолығады.