Бішкекте бір тәулікте коронавирус жұқтырғандардың саны 345-ке жетіп, «омикрон» штамы да тіркелгендіктен «қызыл аймаққа» енген. Бұл туралы Коронавируспен күресу бойынша республикалық штаб хабарлады.
Бішкекте вирус жұқтырғандардың ішінен 303 науқастың ауруы жеңіл түрде, 42 адамда коронавирус симптомсыз өтіп жатыр. 32 адам ауруханаға жатқызылған. Бір тәулікте екі адам қайтыс болған.
Осыған дейін денсаулық сақтау министрі Алымкадыр Бейшеналиев Бішкекте вирус жұқтырғандар көбейіп жатқанын айтып, 400 орын дайындалғанын жеткізген.
12 қаңтарда Қырғызстанда коронавирус жұқтырғандар соңғы бес айдағы рекордтық деңгейге жетіп, 465 адамнан анықталды. Олардың басым бөлігі Бішкек пен Шу өңірінің тұрғындары. Бұл ауырғандар туралы тек ресми мәлімет.