Тәжікстандағы Ауғанстан елшісі 18 тамызда бірінші вице-президент Амрулла Салехті елдің заңды президенті деп атады.
Амрулла Салех Ауғанстан Конституциясына сәйкес елдің заңды президенті болып саналады деді ол.
Ол сонымен бірге президент Ашраф Ғанидың елден қашуын «сатқындық» деп атап, өзімен бірге мемлекеттің 169 миллион доллар ақшасын алып кеткенін мәлімдеді.
Амрулла Салех 2019 жылы өткен президент сайлауында Ашраф Ғанидың кандидатурасын қолдап, кейін бірінші вице-президент болған.
Салех тәліптердің басты қарсыласы. Оған өмірінде өте көп қастандық жасалған. Соңғы рет былтыр қыркүйек айында Кабулде оған қарсы шабуыл болды. Бірақ ол зардап шекпеді, жанындағы он адам қаза болып, он бесі жараланған.
Бұл уақытта Ахмад Шах Масудтың ұлы Ахмад Масуд Ауғанстан халқын тәліптерге қарсы күш біріктіруге шақырып, қарсылық орталығы ретінде Панджшер провинциясын атады.
Ахмад Масуд француз басылымына «Талибан» әлі елді толық басып алмағанын, күресуге мүмкіндік бар екенін айтқан. Ол халықаралық қауымдастықты көмекке шақырған.