Тәжікстан президенті Қырғызстанмен шекарадағы жанжалға екі апта өткенде қаза тапқандардың отбасыларына көңіл айтты.
Ораза айт мейрамы қарсаңында Эмомали Рахмон былай деді: «Тәжікстан мен Қырғызстанның мемлекеттік шекарасында бірнеше күн бұрынғы жанжалда қаза тапқандардың отбасылары мен туыстарына қайғыра көңіл айтамын. Алладан сабыр мен күш-қуат тілеймін».
Тәжік-қырғыз шекарасындағы қақтығыс 28-29 сәуірде болды. Тәжік билігі 6 мамырда ғана шекарадағы жанжалда 19 адам қаза тауып, 87 адам жараланғанын хабарлады.
Қырғыз жағының мәліметінше, шекарадағы жанжалда Қырғызстанның 189 азаматы жараланып, 36 адам қаза тапқан. Қырғызстан президенті Садыр Жапаров 1-2 мамырды ұлттық аза тұту күні деп жариялады.
Тәжік оппозициясының өкілдері президентті қаза тапқандардың отбасыларына көңіл айтпағаны үшін сынаған.
Тәжікстан мен Қырғызстан мемлекеттік шекараны анықтау жұмысын 2002 жылы бастаған. Екі ел арасындағы 976 шақырымдық шекараның 504 шақырымының ғана мәртебесі анықталған.