16 мамырда Жаңаөзендегі «КЕЗБИ» мұнай-сервис компаниясының 20 шақты жұмысшысы астанадағы «ҚазМұнайГаз» компаниясы ғимаратының алдында ереуілдеп жатыр.
Дүйсенбі күні шұғыл медициналық көмек бригадасы жұмысшылардың бірі Айбек Байпаковты ауруханаға алып кетті. Дәрігерлердің айтуынша, оның ыстығы мен қан қысымы көтерілген. Ереуілде жатқандар оның денсаулығына Үкімет үйі мен ҚМГ кеңсесі алдында бірнеше күн бойы түнегені кері әсер етті деп отыр. Жұмысшылар билік пен компанияларды келіссөзге шақырды.
Ереуілдегілердің айтуынша, ҚМГ қауіпсіздік қызметіндегілер оларға телефонды қуаттауға немесе ыстық шайға су қайнатуға рұқсат бермеген. Оларды дәретханаға да жібермей қойған. Дүйсенбі күні ҚМГ өкілі ереуілдегілердің бұл уәжін жоққа шығарды.
Жұмысшылар жатқан орынға жақын маңда полиция автобусы мен арнайы жасақтың онға жуық қызметкері тұрды. Сол жерге ішкі саясат бөлімінің өкілі де келген, бірақ ол әзірге ешқандай мәлімдеме жасамаған.
Дүйсенбі күні министрліктер құрған комиссия жұмыс істей бастады. Оны бас мемлекеттік еңбек инспекторы Төлеген Оспанқұлов басқарады. Алайда ереуілдегілер оның жұмысына күмәнмен қарап, комиссия құрамына өз өкілін қосуды сұрап отыр.
«КЕЗБИ» компаниясының жұмысшылары үш аптадан бері астанада жүр. Олар жалақы өсіру талабы орындалмай үйге қайтпаймыз дейді.