Алексей Навальный колонияда жұмыс істейтін тұтқындар мен қызметкерлердің кәсіподағын құратынын мәлімдеді. Бұл жөнінде ұзақ мерзімдегі жазасын өтеп жатқан оппозициялық саясаткер әлеуметтік желі арқылы хабарлады.
Навальный «Промзона» деген атаумен кәсіподақ құратынын айтып, колония басшысына және Жазаны орындау федералды қызметіне өтініш түсіргенін жеткізді. Ол өзінің бұл әрекетінен тұтқындар қатты қорқып, одан сайын қысым күшейеді деп қауіптенген. Навальный әзірге бұл ұйымға тек өзі ғана мүше екенін айтады.
«Осы әрекетім үшін арнайы комиссия күнде ескерту жасап жатыр. Сонымен бірге маған жасалынатын қылмыс жайында ресми «ескертті», — дейді оппозиционер.
Бірақ ол соған қарамастан, өзі құрған кәсіподақ ұйымының алғашқы жеңісі бар екенін де жеткізді. Өзінің талабы бойынша тігін цехындағы орындықтарды сүйенетін орындықтармен ауыстырған.
«Егер сіз тігін цехында жеті-сегіз сағат отырсаңыз, сүйенетін орындық болуы маңызды», — дейді Навальный.
Алексей Навальный 2021 жылдың қаңтарында Германиядан емделіп оралғаннан кейін ұсталып, абақтыға қамалды. Ол алаяқтық айыбы бойынша 9 жыл бас бостандығынан айырылған.
Халықаралық ұйымдар оны саяси тұтқын деп таныды.
Ол түрмеге жабылғаннан кейін, оның жақтастары жаппай қуғындалып келеді.