Стамбұл соты қала мэрі Эркем Имамоглуды билікті балағаттады деген айыппен екі жыл, жеті айға бас бостандығынан айырды. Сонымен бірге ол бостандыққа шыққаннан кейін саясатпен айналысуға тыйым салған.
Имамоглу қазіргі президент Режеп Ердоғанның басты қарсыласы болатын.
Сот Имамоглудың 2019 жылы айтқан сөздерін «билікті балағаттау» деп таныды. Сол жылы ол билік партиясынан түскен қарсыласын жеңіп, Стамбұл мэрі болып сайланған.
Бірақ сайлау комиссиясы бұрмалаушылық болды деп, сайлауды қайта өткізбек болған. Имамоглу екінші рет өткізілген сайлауда да жеңіске жетті. Сол кезде ол сайлау комиссиясының мүшелерін «ақымақ» деген. Түрік заңдарына сәйкес, билік өкілдерін балағаттаған адам төрт жылға дейін бас бостандығынан айырылады.
Эркем Имамоглу — Түркияда басты оппозициялық Республикалық халықтық партиясының лидері. Бұл партияның негізін қалаған — Мұстафа Кемал Ататүрік.
Сарапшылар Имамоглуны келесі жылы Түркияда өтетін президент сайлауында Ердоғанның басты қарсыласы ретінде атап келген.