Тәжікстанда жанармайдың артынан ұн бағасы да қымбаттады. Бүгінде Душанбеде 50 келі ұн 235-255 сомони тұрады, ал аймақтарда — 290 сомони (25 доллар). Сатушылар мұны Қазақстанда ұн бағасының қымбаттауымен түсіндіреді.
Ұн сатушылар баға одан әрі де өсуі мүмкін дейді. Себебі, Қазақстанның ауыл шаруашылығы министрлігі биыл астықты сатып алу бағасы былтырғыға қарағанда 24 процентке қымбат болатынын ескерткен.
Тәжікстан астық пен ұнды толығымен Қазақстаннан әкеледі. Қазақстан ұн экспортын азайтып, керісінше астық сатуды арттырып жатыр.
Ұн — Тәжікстанның негізгі азығы. Бір адам бір айда шамамен 13 келі нан мен ұн тағамдарын қолданады екен. Орта есеппен көп балалы отбасылар айына екі қап ұн пайдаланады.
Тәжікстан халықты ұнмен толық қамту үшін жылына 1,7 млн тонна астық өндіруі керек.