Азаттықтың өзбек қызметінің дереккөзі Ташкент қаласы Учтеп ауданы прокурорының көмекшісі А.К. 50 мың доллар пара алып жатқан жерінен ұсталғанын мәлімдеді.
Оқиға 29 сәуірде болған. Өзбекстанның бас прокуратурасы бұл ақпаратты растамады, терістемеді де. Баспасөз қызметінің басшысы Хаёт Шамсутдинов «мұндай ақпаратты естімегенін» айтты.
Дереккөздің айтуынша, прокурордың көмекшісін ұстау операциясын Ұлттық қауіпсіздік қызметі өкілдері жүзеге асырған.
«Бетон зауытымен қатысы бар кәсіпкер арнайы қызметке Учтеп ауданы прокуроры пара сұрап жатыр деп хабарлаған. Түс уақытында прокурордың көмекшісі ақшаны алуға барған кезде ұсталды», — деді дереккөз. Көмекші қазір тергеу изоляторында отыр. Ал прокурордың орынбасары Икбол Султановты тергеуге алып, «жоғарғы жақтан» қоңырау шалынғаннан кейін босатқан.
Учтеп ауданының прокуроры Алишер Караев бұл қызметке 2019 жылдың желтоқсан айында тағайындалған.
Дереккөз мәліметінше, Алишер Караев президент әкімшілігінің басшысы Зайнилобиддин Низомиддиновтің жақын туысы болып келеді.