Скриншот: Алматы арнасы
Құрбы-құрдастарының алды болып, өз жұмысын адал атқарып жүрген Жанар осыдан бірер күн бұрын қапыда көз жұмды. Бұл қанды оқиғаны өзінің некедегі күйеуі Азамат Құлымбетов жоспарлы түрде жасаған деген күдік бар. Себебі, оның әйеліне жасаған қылмыстық іс-әрекетін бейнетаспадағы видеодан байқауға болады.
Бұл оқиға Жанардың жұмыс орны Алматы облысы Қарасай ауданы «Асыл арман» тұрғын үйлерінің бірінде орналасқан дәріхана ішінде болған. Ал, ағайын-туыстары қыздарын жиырмадан астам жерінен пышақтап, әбден қансыратып өлтірген 34 жастағы Азамат Құлымбетов қатаң жазаланса дейді.
Қылмыстық оқиғаға байланысты Қарасай аудандық ішкі істер басқармасы сотқа дейінгі тергеу амалдарын жүргізіп жатыр. Құқық қорғау органдарының қызметкерлері бұл істі қатаң бақылауына алып отырғандарын алға тартты.
Бүгінде марқұм болған Жанар Насыровның артында екі ұлы қалды. Ал, оның күйеуі Азамат Құлымбетов «адам өлтіру» бабы бойынша он бес жылға дейін бас бостандығынан айырылуы мүмкін.