Қырғызстан мен Тәжікстанның шекара аймағында мектеп оқушылары арасында келіспеушілік туып, төрт қырғыз оқушысы жарақат алған. Бұл жөнінде Баткен ауданының әкімі Учкун Жоробаев хабарлады.
Оның сөзіне қарағанда, оқиға 23 қыркүйекте сағат 13:00 шамасында Баткен ауданы Көк-Таш ауылының Дахма деген жерінде болған.
«Алдын ала мәлімет бойынша қырғызстандық 8 сыныптың төрт оқушысы мектептен қайтып келе жатқанда Тәжікстанның 11 сыныбының 30-ға жуық оқушысы қырғыз балаларын ұрып кеткен. Оқушыларға алғашқы медициналық жәрдем көрсетіліп, ауруханаға жеткізілген. Қазір жағдайы жақсы», — дейді Жоробаев.
Осы оқиғадан кейін Баткен ауданының әкімі, арнайы қызмет өкілдері Тәжікстанның Исфара ауданы басшысымен және құқық қорғау органдары өкілдерімен кездескен. Нәтижесінде екі тарап тұрғындармен кездесіп, түсіндіру жұмысын жүргізуге және тәртіп бұзғандарды заңға сәйкес жазалауға келіскен.
Бұл оқиға бойынша Тәжікстан әлі ресми түсініктеме бермеді.
Соңғы уақытта Қырғызстан мен Тәжікстан шекарасы маңында жанжалдар жиілеп кетті. Биыл көктемде шекара маңындағы елді-мекенде қарулы қақтығыс болып, Қырғызстан тараптан 36 адам қайтыс болып, 180-нен астам адам жарақат алған. Тәжікстан 19 адам қайтыс болып, 87-сі жарақат алды деп хабарлаған. Осыдан кейін Қырғызстан біржақты шекарасын жапқан. Содан бері әлі ашылмады.