Ресейдің Екатеринбург қаласында Түркіменстаннан келген 26 жастағы қызды өлтірді деген күдікпен қырғыз азаматы ұсталды. Бұл туралы жергілікті E1.ru порталы хабарлады.
Басылым мәліметіне қарағанда, түркімен қызының мәйіті екі апта бұрын қаладағы бір пәтерден табылған. Оны пышақпен бауыздап кеткен. Құқық қорғау органдары күдіктінің ізінен түскен. Күдіктіні ұстау операциясы 11 ақпанда өтті. Күдікті жалға алған пәтерде тығылып жүрген.
— Күдікті ұсталды. Ол қарсылық көрсетпеді. Қылмысын мойындады. Қызды ақша үшін өлтіргенін айтты. Тергеу жүріп жатыр. Оның басқа да қылмыстары тексеріледі, — деген E1.RU дереккөзі.
Хабарларға қарағанда, күдікті — қырғыз азаматы, бұған дейін есірткі сақтағаны үшін ұсталған. Оның үстінен «кісі өлтіру» қылмысы бойынша іс қозғалды.