Қазақстан мен Қырғызстан Тайваньды Қытайдың ажырамас бөлігі санайды
Қазақстан Тайваньды Қытайдың ажырамас бөлігі санайды. 4 тамызда Қазақстан СІМ өкілі Айбек Смадияров осылай деп мәлімдеді. Оның сөзінен ҚазТАГ агенттігі үзінді келтіреді.
«Қазақстан «біртұтас Қытай» принципін қолдайды және Тайваньды Қытай халық республикасының ажырамас бөлігі санайды» деді Айбек Смадияров.
Смадияровтың айтуынша, Қазақстан халықаралық құқық нормалары мен БҰҰ жарғысының сақталғандығын қолдайды. Ол БҰҰ Бас ассамблеясының 1971 жылғы №2758 резолюциясына сүйенген.
«Шет мемлекеттің ресми делегациясының Тайванға сапары Қытай үкіметімен келісілуі тиіс деп санаймын» деді Смадияров.
Осыған ұқсас мәлімдемені 3 тамызда Қырғызстан сыртқы істер министрлігі таратты. Онда «Қырғыз Республикасы, қырғыз-қытай құжаттарының барлығында көрсетілгендей, «тайвань мәселесінде» ұстанымы өзгермегенін және «бір Қытай» саясатын қолдайтынын растайды» делінген.
Бұған қоса СІМ Тайвань төңірегіндегі жағдайды жіті бақылап отырғанын, аралға қатысты келіспеушілік тез шешіледі деп үміттенетінін хабарлады.
2 тамызда АҚШ Конгресі өкілдер палатасының спикері Нэнси Пелоси Қытайдың қарсылығына қарамастан Тайваньға барған. Пекин Пэлосидің Тайваньға барғанына қарсы шыққан. Қытай Тайвань аралын өзінің территориясы санайды. Қытай басшысы Си Цзиньпин АҚШ «отпен ойнамауы керек» деп ескерткен. Пелоси сапары кезінде Қытай Тайваньға жақын Фуцзянь провинциясында әскери жаттығу өткізді.
Винтоверт DeWalt PowerStack DCF850E1T-QW АКБ и ЗУ в комплекте