Kazaksha aqparat

Жамбыл облысында төрт түлікке электронды таңба салынады

Жамбыл облысы Тұрар Рысқұлов ауданында жылқыларды жаппай электронды чиппен таңбалау жұмыстары жүріп жатыр, деп хабарлайды Хабар 24.

«Бұл бірінші кезекте ауру малдарды дер кезінде анықтап, түрлі қауіптің алдын алуға септігін тигізеді», – дейді мамандар. Қыркүйек айына дейін 16 мың бас жылқы нөмірмен веб-порталға тіркемек.
Заманауи таңбалаудың тиімді тұсы көп. Электронды чип арқылы мал ұрланған ба, иесі кім, қай өңірдің малы, ауруға қарсы дәрі-дәрмек егілген-егілмегендігін, тіпті екпе жасалған уақытына дейін анықтауға болады. Бұл сканердің көмегімен жүзеге асырылады. Қазір аталған жұмыстар 15 ауылдық округ пен аудан орталығындағы ветеринарлық пункттерде жүргізіліп жатыр.

— Малыма чип салдырған себебім, жоғалған жағдайда, малым өзімдікі екендігін анық тексеріп алуыма толық сенемін. Базарға апарсаң, бағасы жоғары болуына да әсер етеді. Айқай-шу болған жағдайда, мал менікі екені толығымен тексеріледі, — деді Құлан ауылының тұрғыны Ринат Батырханов.
Чип жылқының мойнына тері астына енгізіледі. Нөмірі арнайы базаға тіркеліп, иесінің қолына паспорты беріледі. Ал малды сатып немесе сойған жағдайда қожайыны тіркеуден шығаруы тиіс.

— Биыл аудандық бюджеттен 10 миллион теңге бөлініп отыр. Ол қаражат біз чиптарды әкеп береміз. Шаруақожалық әр салынған чиптің ақшасын қайтадан бюджетке қайтарып береді. Екі айналдырумен 10 млн 8 мың жылқыға чип алуға мүмкіншілік береді. Екі айналдырумен 16 мың жылқыға чип салып бітіреміз, — дейді Тұрар Рысқұлов ауданының әкімі Асқар Қырықбаев.
Ауданда бүгінгі күнге дейін төрт түліктің 50 пайызына құжат жасалып, веб-порталға есепке алынған. Мамандар малды GPS арқылы онлайн режимде бағуға да мүмкіндік бар деп отыр. Бірақ бұл қарапайым шаруа үшін экономикалық жағынан тиімсіз көрінеді.

— Бағасы 80 мыңнан жоғары. Малға түгел салуға тиімсіз, асылтұқымды малға және үйірлі жылқыларға салуға болады. Келешекте ол жұмысқа да көшеміз деген ойымыз бар, — деді Тұрар Рысқұлов ауданы ветеринария бөлімінің басшысы Асқар Тоқыбаев.
Ал ірі қара мен уақ малдар сырғаланады. Биыл қой мен ешкіден түскен 142 мың төл мен 14 мың бас бұзауға сырға мемлекеттен тегін беріледі.

Айта кету керек, жалпы облыс бойынша 35 мыңнан астам құлынға чиппен таңба салу жоспарда.

09.04.2018 / от / в
Жамбыл облысындағы Жаңатас «ақылды» қалаға айналады

Ол үшін алдымен әбден ескірген темір жол және автобекет ғимараттары қайта салынады.

Жаңа бас жоспарға сай шаһар тұрғындарының тұрмысын мейлінше жеңілдету көзделіп отыр, деп хабарлайды Хабар 24.

Ол үшін алдымен әбден ескірген темір жол және автобекет ғимараттары қайта салынады. Қос нысан заманауи құрал-жабдықпен жарақталады. Сондай-ақ қалада «Жастар сарайы» пайда болады. Ол жерде оқушылар мен студенттерге қажет ақпаратын алуға барлық мүмкіндік жасалады. Смарт-технологияларды енгізу жұмысы қалада басталып кетті. Қазір көшелердегі аялдамаларда ақын-жазушыларының өмірі мен шығармашылығы жайлы ақпарат беретін тақтайшалар ілінген. Ондағы бүкіл мәліметті оңай ұялы телефонға жүктеп, танысуға болады.

— Көше бойында жарық шамдары, көшелер, үйлерге кіре берістегі жолдардың барлығы «Ақылды қала» бойынша өзгертіледі. Алдағы уақытта істейтін жұмыстарымыз 4,5-мөлтек ауданындағы инфрақұрылым дамыту арқылы өзгертіледі, — деді Сарысу ауданы әкімінің орынбасары Берген Омарбеков.

20.03.2018 / от / в
Жамбылдық полицейлер әйелдер қауымына гүл таратты

Олар жолға шығып, қыз-келіншектер тізгіндеген көліктерді тоқтатып, 100 гүл ұсынды.

Жамбылдық полицейлер жүргізуші әйелдерді 8 наурыз мерекесімен құттықтады, деп хабарлайды Хабар 24.

Бұл шара тәртіп сақшылары арасында дәстүрге айналған. Олар жолға шығып, қыз-келіншектер тізгіндеген көліктерді тоқтатып, 100 гүл ұсынды. Тіпті жол жүру ережесін бұзған кейбір жүргізушілерге кешіріммен қарап, мерекелік көңіл-күй сыйлады. Соңғы жылдары өңірде көлік жүргізетін әйелдер қатары артқан. «Олар темір тұлпарды ер азаматтардан кем басқармайды», – дейді инспекторлар.

— Менде бірінші рет мұндай болып тұр. Таразға жұмыс бабымен қонаққа келген едім. Жолда жүру ережесін бұзбаған секілді едім. Қорқып кеттім. Рақмет! Қуаныштымын. Жұмыстарыңыз алға баса берсін. Шаршамаңыздар, — дейді көлік жүргізушісі Жазира Маманова.

— Әрқайсысына гүл сыйлаудамыз. Тараз қаласы бойынша қазір бізде 5 автоэкипаж, яғни 10 қызметкер дәл осындай іс-шарамен айналысуда. Осыған орай әйел азаматтарын халықаралық мейрамдарымен құттықтаймын. Жол ережесін бұзбай сақтап жүрсін, — деді полиция аға сержанты Дидар Қадіров.

07.03.2018 / от / в
Жамбыл облысының әкімі үйсіз жүрген фототілшіге 3 бөлмелі пәтер кілтін сыйлады

Аймақ басшысы журналистердің әлеуметтік жағдайына көңіл бөліп, қолдан келгенше көмек қолын созу қажеттігін қадап айтты.

Фото : Жамбыл облысы әкімінің баспасөз қызметі

Бүгін Жамбыл облысының әкімі Кәрім Көкірекбаев жергілікті «Арай» газетінің фототілшісі, журналистика саласында 16 жыл жұмыс жасап келген 4 қыздың әкесі – Алтынбек Қартабайға 3 бөлмелі пәтер кілтін сыйлады, деп хабарлайды Жамбыл облысы әкімінің баспасөз қызметі.

Сондай-ақ, аймақ басшысы журналистердің әлеуметтік жағдайына көңіл бөліп, қолдан келгенше көмек қолын созу қажеттігін қадап айтты.

Еске сала кетейік, Кәрім Көкірекбаев телеарналар мен басылым беттерінде облыстың әлеуметтік-экономикалық дамуын жан-жақты көрсетіп, қоғамдық-саяси ахуалының тұрақтылығын қалыптастыруда зор үлес қосқан республикалық, жергілікті БАҚ өкілдерін қабылдап, Тәуелсіздің мерекесі қарсаңында қорытындысы шыққан байқаудың жеңімпаздарын марапаттады.

Кездесу барысында сөз сөйлеген облыс әкімі аталған шара жыл сайын дәстүрге айналғандығын тілге тиек етіп, облыста атқарылып жатқан істерге де тоқталып өтті.

— Құрметті журналистер! Қадірменді бұқаралық ақпарат құралдарының өкілдері! Жыл соңында облыс журналистерімен жарқын жүзді, ашық әңгімелесу оң тәжірибесі орнықты. Бүгін, сол дәстүрді жоғалтпай, сіздермен арнайы кездесудің сәті түсіп отыр. Желтоқсан айы айтулы күндерімен ерекше. Қазақстан Республикасы Тұңғыш Президенті күні мен Тәуелсіздік күнін атап өттік. Өздеріңізге белгілі, 2018 жылы елордамыз Астана қаласының 20 жылдық мерейтойын атап өтеміз. Елімізде бас қаламыздың мерейтойы аясында өтетін шаралар 10 желтоқсаннан бастау алып, аудандарға ақпараттық пойызды аттандырдық. Айтулы ұлық мерекелермен сіздерді шын жүректен құттықтаймын! – деді Кәрім Көкірекбаев.

Сонымен қатар, соңғы жылдары облыс өмірінің тыныс-тіршілігін көрсету, оны қалың оқырманға жеткізу мақсатында журналистер арасында арнайы конкурс өткізудің жақсы дәстүрі қалыптасқанын да атап өтті.

Айта кетерлігі, бүгінде Жамбыл облысында 55 бұқаралық ақпарат құралдары табысты қызмет атқаруда. Оның ішінде газеттер – 39, журналдар – 11, ақпараттық портал – 3, электронды БАҚ – 2. Мемлекеттік БАҚ — 14, мемлекеттік емес БАҚ – 45.

zakon.kz

14.12.2017 / от / в