Ақтөбеде шабуыл жасаған үш адам өлтіріліп, бірі жараланды

Последнее обновление Июл 24, 2016 211 0

ІІМ-нің ресми өкілі Алмас Садубаев Ақтөбедегі атысқа қатысты түсініктеме берді.

«Ақтөбе облысының Ішкі істер басқармасына «Паллада» оқ-қару дүкеніне шабуыл жасалғаны туралы хабарланды. Сонымен қатар басқа оқ-қару дүкеніне және Ұлттық гвардия бөлімшесіне шабуыл жасалғаны белгілі болды. Шабуыл кезінде «Паллада» дүкенінің сатушысы қаза тауып, бір адам жараланды. Әскери бөлімде шабуылға тойтарыс бермек болған офицер мен келісімшарт бойынша қызмет етіп жүрген әскери қаза тапты. Үш әскери жарақаттанды», — делінген хабарламада.

ІІМ ақпараты бойынша, шабуыл жасағандардың бірі ұсталып, үшеуінің көзі жойылған. Сондай-ақ бір қаскөй жарақаттанды.

«Қазір бірнеше қаскөйдің әрекетіне тосқауыл қойылды. Кейбірі ізін суытып үлгерді. Шабуыл жасағандар, кейбір деректер бойынша, діни ағымдардың бірін насихаттаған», — деді Садубаев.

Сонымен қатар қаладағы қоғамдық көлік пен ойын-сауық орындарының жұмысына уақытша шектеу қойылды.

Жалпы алты адам атыс кезінде көз жұмған, оның екеуі — әскерилер. Жарақаттанғандар саны 11 адам.

Бұған дейін Tengrinews.kz тілшісі қаланың жедел медициналық жәрдем станциясына сілтеме жасап, 20 шақты адамның жараланғанын хабарлаған болатын.

Оқиғаға куә болғандардың айтуынша, атыс бүгін, 5 маусымда, түстен кейін сағат 2-лер шамасында орын алған. Бұған дейін қаскөйлер «Спутник» ауданында орналасқан оқ-қару дүкенін тонаған деп жазады «Диапазон».

Зардап шеккендердің қатарында бейбіт тұрғындар мен қару-жарақ дүкенінің қызметкерлері де бар болып шықты.

Бұған дейін екі адам зардап шекті деген ақпарат шыққан болатын.

Куәгерлердің мәліметтері бойынша, Ақтөбеде қаланың ескі бөлігіндегі «Пантера» және 5-ші «Паллада» шағынауданындағы екі қару-жарақ дүкені тоналды.