Алматыда митингке шыққандардың сегізі 20 тәулікке дейін қамауға алынды
Алматының әкімшілік соты 24 сәуірде саяси тұтқындарды босатуды талап еткен митингке шыққандардың 11-ін жауапкершілікке тартты.
Олардың сегізі әкімшілік қамауға алынса, үшеуіне айыппұл салынды. Бұл жөнінде Алматы қалалық сотының баспасөз қызметі хабарлады.
Азаматтық белсенділер Әйгерім Тілеужан, Алина Берменкұл, Бауыржан Отынбаев, Бекен Бейсалиев, Конай Абдиев және Досжан Қуаныш 20 тәулікке қамалса, Равкат Мұхтаров пен Майра Габдулина 15 тәулікке жабылған.
Қаңтар оқиғасына байланысты күдікті ретінде тергеу абақтысында отырған Дархан Уәлиевтің әйелі Бұлбұл Бердіқожановаға 91 890 теңге (200 доллар шамасы) көлемінде айыппұл салынған.
Сот шешіміне сәйкес, Бердіқожанова, Шырынбекова, Асанбай Хожиев пен Мұхтар Габдуллин заңсыз митингті ұйымдастырды деп танылған.
Азаматтық белсенді Сәния Тұңғатарова Азаттық радиосына сот шешіміне келіспейтінін, бәрі қайта шағымданатынын мәлімдеді.
24 сәуірде күндіз ондаған белсенді Ғылым академиясының алдына жиналып, «саяси тұтқындарды», Қаңтар оқиғасына байланысты ұсталғандарды босатуды талап еткен. Арасында белсенді Әйгерім Тілеужан да бар. Ол осыған дейін әкімдікке митинг жөнінде ескерту бергенін айтып, бірақ жазбаша жауап келмегенін хабарлаған. Сенбі күнгі митинг кезінде ол билік «саяси тұтқындарды босатпайынша» апта сайын наразылық өткізе беретінін айтты.
Винтоверт DeWalt PowerStack DCF850E1T-QW АКБ и ЗУ в комплекте