Алматыда қарапайым жігіт теңдессіз хостел ашып, өз арманына қол жеткізді
Қарапайым отбасынан шыққан алматылық жігіт Шәкір Исламбакиев өз хостелін ашуды армандап келген.
Бүгінде ол ерен еңбегінің арқасында сол арманына қол жеткізіп отыр деп хабарлайды NUR.KZ порталы Сosmo.kz сайтына сілтеме жасап.
Күнделікті кеңседегі жұмыс азаматтың көңілінен шықпайтын. Бар қаражатын салып, хостел ашуы сәтсіздікке ұшырай ма деген күдік біраз уақыт Шәкірді тоқтатып келген.
Дегенмен, Минскіге іссапары кезінде Шәкір хостелде түнеп, өзі де Алматыдан хостел ашуы тиіс екенін сезінген. Ол аяқ асты бұл ойын жүзеге асыруға кірісіп кетеді.
«Бастапқыда қатты қорықтым. Белгісіз бағытқа кеткен оңай емес. Барлық жинаған қаражатымды алып, қарызға батсам да, екі апта ішінде хостелге орын тауып, өз арманымды жүзеге асырдым. Ісімді енді бастағанымда тәжірибесі мол әріптестерімнен кеңес алдым. Әр қадамда қандай да бір мәселелер туындауы мүмкін екенін олар ескертіп отырды», — дейді Шәкір.
Мамыр айында Almaty Hostel Dom хостелінің ашылғанына бір ай болады. «Компот» ауданында орналасқан екі этажды үйде Wi-Fi, есігі жабылатын сөрелер қарастырылған. Тәулігіне 1500 теңгеге түнеуге болатын хостелге әр елдің түкпірінен туристер ағылады. Парагвай, Жаңа Зеландия, Жапония, Франция, АҚШ елінің тұрғындары Алматыны көру үшін жиі келеді дейді Шәкір.
Шәкір әлі күнге дейін табысының жемісін көрген жоқ. Себебі, барлық түскен табысын ол хостелді жақсартуға жұмсап жүр.
«Мен хостелімді керемет достықтың, шығармашылықтың шоғырланған мекені еткім келеді. Жай түней салатын орын емес, түрлі мәдениеттер тоғысқан жайлы да шуақты жер болғанын қалаймын», — дейді ол.
Жақында оның хостелін Booking ең үздік хостелге жатқызып, Guest Review Award жүлдесін табыстады. 10 балдың 9,2-ін жинаған хостелге жүлде Голландиядан келіп жетті. Almaty Hostel Dom — Қазақстанда осындай жүлде алған алғашқы хостел.
«Бір жыл болмай жатып осындай жетістікке қол жеткізгеніміз жаман емес. Мен бұл жүлдені маған әу бастан сенім артқан әрі қолдау көрсетіп келген әжеме табыстадым. Әжем, тіпті хостелдегі тазалықты өз мойнына алып, арманымды жүзеге асыруға көмектесіп жүр», — дейді Шәкір.
Жақында Шәкір екінші хостел ашып, қала ішінде хостелдер желісін қалыптастыруды мақсат етуде. Тіпті өз жобасына инвесторды да тауып үлгерген. Енді тек хостелге ыңғайлы орнын тапса болғаны.
Винтоверт DeWalt PowerStack DCF850E1T-QW АКБ и ЗУ в комплекте