Түркістан облысының қорғаныс істері жөніндегі департаменті және білім басқармасының «Облыстық қосымша білім беруді дамыту орталығының» ұйымдастыруымен Төлеби ауданы «Бәйшешек» жазғы сауықтыру легерінде «АЙБЫН- 2023» облыстық әскери-патриоттық жиынына іріктеу сайысы өткізілді.
Жарыстың ашылуына Түркістан облыстық Қорғаныс істер жөніндегі департаменті бастығының орынбасары Жандос Күлдербаев, облыстық білім басқармасы «Облыстық қосымша білім беруді дамыту орталығының» директорының орынбасары Айсұлу Егембердиева, «Қарулы Күштерінің ардагерлері» республикалық қоғамдық бірлестігінің ардагерлері қатыстысып жас сарбаздарға сәттілік тілеп жылы лебіздерін білдірді.
Жалпы жарысқа аудан, қалалардан барлығы 17 командадан құралған 255 жасөспірім қатысты. Белтемірге тартылу, арқада жатып кеудені көтеру, әскерилендірілген кросс, арқан тарту, пневматикалық мылтық ату, АК-74-ті жартылай шашу мен жинау, жамылғы түріндегі жалпы әскери қорғаныс киімін кию сынды жарыс түрлерінен жастар бақ сынады.
— Болашақ ел сарбаздарын жастайынан жауынгерлікке баулу, олардың бойына отаншылдық ерлік рухты қалыптастыру қазақстандықтардың ортақ парызы, тікелей міндеті болып табылады. Жыл сайын ұйымдастырылатын бұл шараға алдыңғы жылдармен салыстырғанда нәтижелер анағұрлым жақсы деуге болады. Тартысты өткен іріктеу сайысынан анықталған 10 ер баламыз бен 5 қыз баламыз алдағы республикалық сайыста жақсы нәтижелер көрсетеді деп сенемін, – дейді Қорғаныс істер жөніндегі департаменті бастығының орынбасары подполковник Жандос Күлдербаев.
«Айбын» облыстық әскери-патриоттық жастар жиынының қорытынды бойынша І орын – Арыс командасына бұйырса, ІІ орынды – Кентаулықтар жеңіп алды, ал үздік үштікті Төлеби ауданының құрамасы тұрақтады.
Жарыс жеңімпаздарына қаржылай сыйақы, дипломдар және медальдар табысталды. Жарыс жеңімпаздары маусым айында Қарағанды облысында өткізілетін республикалық кезеңге жол тартады.
Шымкент гарнизонының баспасөз қызметі
Винтоверт DeWalt PowerStack DCF850E1T-QW АКБ и ЗУ в комплекте