Қырғыз парламентінің жаңа құрамы жұмысқа кірісті. Депутаттар ант берді
29 желтоқсанда Жогорку Кенештің жаңа – VII-құрамы жұмысқа кірісті. Парламенттің отырыс залында ОСК төрайымы Нұржан Шайлдабекова жаңадан сайланған депутаттарға куәлік пен төсбелгі тапсырды. Депутаттар ант қабылдады.
Сайлауға өз-өзін ұсынып, бір мандатты округтардан (тағы екі округта сайлау қайта ұйымдастырылады) сайланған 34 депутат бірінші болып ант берді.
Одан соң партия өкілдері депутат куәліктерін алып, ант қабылдады. Сайлау нәтижесі бойынша алты партияның — «Ата-Жұрт Қырғызстан» (15 мандат), «Ишеним» (12), «Ынтымақ» (9), «Альянс» (7), «Бутун Қырғызстан» (6), «Ыйман Нуру» (5) — өкілдері парламентке кірді.
Бүгін парламенттің жаңа құрамы спикерді сайлайды. Азаттық радиосының қырғыз қызметі — «Азаттыктың» хабарлауынша, бұл қызметке жалғыз кандидат ұсынылған. Ол — Талант Мамытов, бұған дейін VI-құрамның спикері болған. «Бутун Қырғызстан» партиясының жетекшісі Адахан Мадумаров спикерлікке өзін ұсынуы мүмкін екенін айтты.
28 қарашада Қырғызстанда парламент сайлауы өтті. Жогорку Кенештегі 90 депутаттың 54-і партиялар атынан, қалғаны бір мандатты округтарда сайланды.
newstaraz.kz