Қырғызстанда 84 мыңға жуық баланың ата-анасы еңбек мигранты болып жүр
Қырғызстанда 84 мыңға жуық баланың ата-анасы еңбек мигранты болып жүр. Қиын жағдайда қалған мигранттарға көмектесу, хабар-ошарсыз кеткендерді іздестіру мәселелері жөніндегі жиында Қырғызстан премьер-министрінің орынбасары Жылдыз Бақашова осындай дерек айтты.
Онлайн-конференцияда еңбек мигранттарына көмектесу, хабар-ошарсыз кеткендерді іздестіру кезінде шетелдегі қырғыз диспораларымен байланыс мәселелері талқыланған.
Жылдыз Бақашова қырғыз үкіметі ата-анасы шетелге еңбек мигранты болып кеткен балалар құқықтары назарда ұсталатынын атап өтті.
Былтыр, 2020 жылдың соңында қырғыз ресми орындары ата-анасы шетелге еңбек мигранты болып кеткен 85 459 бала бар екенін хабарлаған еді.
Бейресми мәліметтерге қарағанда, Қырғызстанның миллионға жуық азаматы еңбек мигранты болып жүр. Олардың басым көпшілігі Ресейде. Түркия мен Қазақстанға кеткендері де көп. Еуропа мен АҚШ-қа кетушілердің де жыл сайын жиілеп бара жатқаны байқалған.
newstaraz.kz