Өзбекстанда шетелдегі өзбектерді қолдайтын «Ватандошлар» қоры құрылды

Өзбекстан президенті Шавкат Мирзияев 11 тамызда «Ватандошлар» қоғамдық қорын құру туралы жарлыққа қол қойды.

Ресми мәліметке қарағанда, қордың мақсаты — «шетелде тұратын отандастарды тарихи отаны төңірегіне біріктіру, олардың жүрегінде елге деген мақтаныш сезімін нығайту, ұлттық ерекшелікті сақтау, отандастар мен олар құрған түрлі білестіктерді қолдау».

Қордың негізгі бағыттары да айқындалды. Қоғамдық қор шетелде тұратын отандастардың қоғамдық бірлестіктерімен әріптестік байланыс орнатады, оны нығайтады; шетелде тұратын отандастардың құқықтары мен еркіндігін қорғауға көмектеседі; шетелде қиын жағдайда қалған отандастарға материалдық және әлеуметтік көмек көрсетеді; өзбек тілін, мәдениеті мен дәстүрін шетелде дамытуға және сақтауға қолғабыс етеді; шетелде тұратын дарынды отандастарға жағдай жасайды.

«Ватандошлар» қоғамдық қорының жоғарғы органы ретінде қамқорлық кеңесі бекітілген. Жергілікті ақпарат құралдарының хабарлауынша, бұл кеңесті Өзбекстанның халық әртісі Шерәлі Жураев басқарады, оның орынбасары қызметін белгілі төреші Равшан Ирматов атқарады.

Қорды құруға қажетті 5 млрд сум ($470 мың) үкіметтің резерв қорынан бөлінеді.

Мәліметтерге қарағанда, қор Өзбекстаннан шығып, әлемнің жүзден астам елінде орныққан 10 миллионнан астам өзбекке, сонымен бірге олардың 170-тен астам мәдени орталықтарына қолдау көрсетеді.

Источник