Қырғыз банктері Тәжікстанмен шекарадағы қақтығыста зардап шеккен азаматтардың бірқатарының несиесін кешірді
Қырғызстанның төрт комерциялық банкі қырғыз-тәжік шекарасындағы қарулы қақтығыстан зардап шеккендердің бірқатарының несиелерін біржола кешіріп, енді кейбіріне жеңілдік берді. Бұл туралы қырғыз үкіметінің Баткен облысындағы құзыретті өкілдігі хабарлады.
Атап айтқанда “Компаньон” банкі 2 млн сомға гуманитарлық көмек көрсетіп, 17 азаматтың несиесін кешіріп, үш азаматтың несие пайызын төмендеткен.
«РСК» банкі Баткенге 2 млн 284 мың сом аударып, қаза болған бір әскери қызметкердің несиесін кешірген. Жарақат алған жеті әскери қызметкердің несиесінің пайыздық сыйақысы алты айға тоқтатылған.
Сонымен бірге «РСК» шекара аймақтарын қолдау мақсатында, облыстағы Көк-Таш, Мақсат, Ак-Сай ауылының халқына 10 млн сом қаржы бөліп, жеңілдетілген несие беруге шешім қабылдаған. Несие 12% сыйақымен үш жылға, комиссиясыз беріледі.
«Бай-түшүм» банкі болса шекарадағы оқиғада қайтыс болған екі азаматтың және үй-жайы өртенген жеті азаматтың несиесін толық кешірді.
Үкіметтің Баткендегі арнайы құзыретті өкілі Абдикарим Алимбаев осыған дейін облыстағы банк өкілдерімен кездесіп, зардап шеккен азаматтарға жеңілдік беру мүмкіндіктерін қарауды сұраған.
newstaraz.kz