Ақтөбе облысы билігі жүзден астам оқушының орамалын шешкізген
Ақтөбе облысының билігі «мектеп формасы талаптарын сақтауға» байланысты жүргізілген науқанның нәтижесі бойынша есеп берді.
Биліктің мәліметі бойынша, оқу жылының басында Ақтөбе облысында 340 оқушы қыз мектепке орамал тартып келіп жүрген. Үшінші тоқсаннан бастап орамал таққан оқушыларды мектепке кіргізбей қойғаннан кейін кей ата-аналар мектеп талабына келіскен.
«Қаңтар айы басталғалы бері облыста 123 оқушы қыз орамалын шешіп, мектеп формасын ұстануға келісім берді. Өз ұстанымын өзгертпей отырғандар да бар. Әлі де 217 оқушы мектеп формасын сақтамай отыр» деп хабарлады Ақтөбе облысы әкімінің баспасөз қызметі.
Осының алдында бір топ ата-ана «мұғалімдер балаларымыздың конституциялық құқығына қол сұғып отыр» деп, сотқа шағым түсірген. Сот отырысы 22 қаңтарда өтеді.
newstaraz.kz