Ақтөбе облысында ішімдікке тойып алған ер адам Шығанақ Берсиевтің ескерткішін қиратты

Ақтөбе облысында ішімдікке сылқия тойған ер адам Шығанақ Берсиевтің ескерткішіне мінген. Мұнысымен қоймай, ақ тарының атасына қойылған тас мүсіннің оң жақ қолын, бас киімі мен тұғырын сындырыпты.

Бұл туралы Керек-info порталы хабарлайды.

Оқиға жетінші мамырда Ойылда болған. Мейрам күні ішімдік ішкен жігіт ауыл клубының алдында тұрған Шығанақ Берсиевтің ескерткішіне мінген. Бұл аз болғандай, мүсіннің оң жақ қолын, бас киімінің алдыңғы жағын және ескерткіш орнатылған тасты бүлдірген.

Ойыл ауданының соты 22 жастағы жігітке Қылмыстық Кодекстің вандализм бабы бойынша айып тақты. Сот отырысы кезінде ер адам өз кінәсін толықтай мойындады. Облыстық соттың баспасөз қызметінің мәліметінше, айыпталушы жұмыс істемейді.

Сот үкімімен ол енді 200 сағатқа қоғамдық жұмысқа жегіледі. Бұған қоса коммуналдық мемлекеттік қазыналық кәсіпорнының пайдасына 200 мың теңге төледі. Үкім заңды күшіне енген жоқ.