Ақтөбе облысының тұрғыны жетім баланы ақшамен алдап, құлдықта ұстаған

Жасұлан Сәндібеков осыдан екі жыл бұрын Ақтөбедегі «Жайсан» жетімдер үйінен шыққан. Содан бері  жалданып жұмыс жасап, әркімнің табалдырығында жүрген ол соңғы қожайыны еркінен тыс ұстап, нағыз құлға айналдырғанын айтады.

Сөзінше, ақша төлеймін деп Қобда ауданына алдап алып кеткен азамат оны барғаннан кейін күндіз-түні малдың соңына салып қойған.

«Ал, қашып кететін болсаң өлтіремін» деп қорқытыпты. Азаппен өмір сүрген жеткіншек Қобда ауданынан Ақтөбеге жаяулатып қашқан. Қазір құлдықтан босаған ол облыстық аурухананың гаражын паналап жүр.

Жол бойынан тауып алған аурухана жүргізушісі оны әзірге гараждың бір бөлмесіне орналастырыпты. Қаржау Бедеров Жасұланды өз үйіне тіркеуге отырғызған және оған қазір жан-жақтан жұмыс іздеп жатқан көрінеді.

Ал ата-анасының қамқорлығын сезіне алмаған осындай балаларды бақылайтын арнайы мекеме жетімдер үйі түлектерінің қал-жағдайын жиі біліп тұрамыз деп ақталғандарымен, Жасұланның оқиғасынан хабарсыз болып шықты.

Айтуларынша, егер құлдыққа қатысты ақпарат расталатын болса, құқық қорғау органдарына дейін көтеріп жағдайды анықтайтын болады.