Асқар Ақаев: Енді Қырғызстанға кез келген уақытта бара алам
Қырғызстанның алғашқы президенті Асқар Ақаев Мәскеуге оралған соң «Московский Комсомолец» басылымына сұқбат беріп, «елде өзіне қарсы қозғалған істердің бәрі жабылғанын» мәлімдеді.
«Енді Қырғызстанға сол елдің азаматы ретінде кез келген уақытта баруға болады. Қазіргі президент Садыр Жапаровтың еңбегін атап өткен жөн. Ол өзі хабарласып, 16 жылда істер қордаланып қалғанын, оларды шешу үшін түсіндіруім керектігін айтты», — дейді Ақаев.
Бұрынғы президенттің мәлімдеуінше, оның Бішкекке сапарын Садыр Жапаров пен Ресей президенті Владимир Путин мақұлдаған.
Ақаев әзірге Қырғызстанға оралғысы келмейді. Ол қазір Ресей астанасында Мәскеу мемлекеттік университетінде істейді.
Ақаев Бішкекке 14 желтоқсанда келді. 20 желтоқсанда ол Мәскеуге қайтты. Қырғызстанда тергеу оған тағылған айыптардың бәрін алып тастады.
Асқар Ақаев Қырғызстанды 1990-2005 жылдар аралығында басқарды. 2005 жылы наурызда «қызғалдақ төңкерісі» кезінде ол отбасымен Ресейге қашуға мәжбүр болды.
newstaraz.kz