Атақты жазушы Сәбит Досановтың ұлы қарамағында істейтін заңгерді сабап тастады

Бастыққа жалған келісім-шарт дайындап бермегенім үшін таяқ жедім дейді өзі.

«Желкемнен келіп жұдырықпен ұрды. Содан шашымнан тартып тепкінің астына алды аяғымен. Кабинеттен қашып шығып бара жатқанда, құйрығымнана тепті. Сонымен аяғымнан сүйреп екінші есіктен сүйреп кіргізді. Қабылдау бөлмесіндегі тұрған камера соны түсірді», — дейді Ақтөбе қаласының тұрғыны Дархан Смайылов.

Заңгер айыптап отырған Абай Досановты жұрт білмегенімен, әкесі мен қайынжұрты елге танымал. Жазушы Сәбит Досановтың ұлы, Тұрлыхановтар әулетіне күйеу бала екен. «Енді оның бассыздығын кешірмейміз» деп отыр жәбірленушінің туыстары.

Дархан Смайыловтың анасы Айман Смайылова. Кадр КТК арнасы

«Жазасын алсын. Үкімет бар ма? «Машинаңды өртеймін, өмір бойы кредит төлеткіземін» деген сөздер айтқан. Ол не деген сөз? Ақымақтық. Мен айтпаймын ондайды әйел болып», — дейді Дархан Смайыловтың анасы Айман Смайылова.

КТК арнасының тілшілері Абай Досановтың өзін таңнанан бері іздеп жұмыс орнынан таппаған. Тек түске таман хатшысына тілшілерге бер деп тілімдей қағаз тастап кеткен. Онда да төбелес туралы ләм-мим демепті. Тек заңгерге әзірлетпек болған құжатқа қатысты деректер келтірген.

Ал хатшысы хатты ұстата сала қашып кетті. Қазір шойын жол мекемесі басшысының әрекетін тергеумен желілік ішкі істер бөлімі айналысып жатыр. Олардың айтуынша, бірнеше сот-медициналық сараптама тағайындалған.