Душанбедегі ауған елшісі вице-президенттің Тәжікстанға қашпағанын жеткізді
Ауғанстанның Душанбедегі елшілігі өлкенің вице-президенті Амрулла Салех Панжшерден Тәжікстанға қашып келгені туралы мәліметті теріске шығарды.
Елші Мухаммад Захир Агбардың айтуынша, Салех қазір Панжшердегі базасында.
«Салех мырза Тәжікстанда емес. Ақпарат құралдарындағы хабарлар жалған. Ол соғыс жүріп жатқан аумақтан ешқайда кетпеді. Қазір Панжшер шатқалында қарсылық күштерінің жауынгерлерімен бірге», — деді елші.
Осының алдында Al-Jazeera телеканалы 5 қыркүйекте Ауғанстанның вице-президенті Амрулла Салех Панжшерден Тәжікстанға шығып кетті деп хабарлаған.
«Талибан» қозғалысының баспасөз хатшысы Забехулла Мужахид те 6 қыркүйекте Кабулда өткізген баспасөз мәслихаты кезінде Салех көрші елге қашып кетті деп мәлімдеген.
Тәліптер Кабул қаласын басып алып, президент Ашраф Ғани Ауғанстаннан шығып кеткеннен кейін, өлкенің бірінші вице-президенті Амрулла Салех өзін уақытша мемлекет басшымын деп жариялаған.
Салех Ауғанстан азаматтарын тәліптерге қарсылық көрсету қозғалысына бірігуге шақырған.
Амрулла Салех тәліптердің басты қарсыластарының бірі болып саналады. Ол бірнеше рет Пәкістан билігі атына сын айтып, Исламабадты Ауғанстанның ішкі ісіне араласып жатыр деп айыптаған. Салехке бірнеше рет шабуыл жасалған: соңғы рет 2020 жылдың қыркүйегінде тіркелген.
newstaraz.kz