Маңғыстау облысы көпбейінді балалар ауруханасының жұқпалы аурулар бөлімшесінде баспасөз-туры ұйымдастырылды

On Дек 4, 2019 264 0

Шара кезінде бұқаралық ақпарат құралдарының өкілдеріне жұқпалы аурулар бөлімшесінің қазіргі жағдайы таныстырылды. Журналистердің сұрақтарына Маңғыстау облысы денсаулық сақтау басқармасы басшысының орынбасары Ләззат Есенғалиева және облыстық көпбейінді балалар ауруханасының директоры Аманбек Жумиров жауап берді.

Айт кету керек, қазіргі уақытта өткір вирусты жұқпа, іш өту және қызылша ауруының маусымдық таралуы байқалады. Маңғыстау облыстық көпбейінді балалар ауруханасының жұқпалы аурулар бөлімшесінің қабылдау бөлмесіне тәулігіне жүз, кейде одан да көп бала қаралуға келеді. Оның ішінде күніне 10-20 бала жатып ем алады.

Облыстық денсаулық сақтау басқармасы басшысының орынбасары Ләззат Есенғалиеваның айтуынша, қазіргі уақытта жедел респираторлық-вирустық инфекциялары эпидемиологиялық ахуалын ескере отырып, облыстық жұқпалы аурулар ауруханасының үшінші қабатынан 20 төсектік орындар бөлінген. Барлық қажетті заттар және дәрі-дәрмекпен барынша қамтамасыз ету мәселесі шешімін тапқан.

«Бүгінгі таңда өңір бойынша қызылшамен ауырғандар саны көбейіп отырғандығы байқалады. Жұқпалы аурулар бөлімшесінің бірінші қабатында алты палатаның есіктері уақытша тарс жабылды. Осылайша емделушілер бір аурудан сауығып, екінші ауруды жұқтырып алмау үшін осылай жасауға тура келіп тұр. Яғни қызылша, іш өту және ауа-тамшылы жұқпа арқылы бір баладан екінші балаға берілуінің алдын-алу қолға алынды. Бұл ретте «Nur Otan» партиясының өңірлік филиалы және облыс әкімдігіне алғыс айтқым келеді, себебі олар қажетті заттарды алуға мүмкіндігінше қол ұшын созуда», — дейді ол.

Қазіргі уақытта балалар ауруханасының жұқпалы аурулар бөлімшесінде ем алып жатқан балалар саны 95. Көбіне аймақтың бес ауданы, сонымен қатар Ақтау және Жаңаөзен қалаларынан келіп ем алып жатқандар. Ішінде Алматы облысының тумасы да бар. Оның есімі Жанна Сонарбаева.

«Мұнда ем алып жатқанымызға 2 күн болды. Қазір баламның жағдайы жаман емес. Ақ халатты абзал жандар барынша көңіл аударуда. Медбикелер сұрағаныңды тауып беруге тырысып бағуда және өтінішіңді жерде қалдымайды. Бірақ бір ұсынысым бар, аурухана басшылығы ғимаратқа күрделі жөндеу жүргізілгенін қадағаласа дұрыс болар еді. Барынша көңілден шығатындай етіп жағдай жасалғаны дұрыс. Жалпы балалар үшін медбикелер аянып қалып жатқан жоқ. Ең бастысы ұлымның жазылып келе жатырғаны қуантады», — дейді ол.

Айта кету керек, мұнда емделушілердің басым бөлігі Мұнайлы ауданының тұрғындары болып отыр. Мәселен, Гүлбану Ибрагимова өзінің ұлы жұқпалы аурулар бөлімшесіне өте қатаң түрде түскендігін айтады. Қазір дәрігерлердің үнемі бақылауында болғандықтан беті бері қараған.

«Алғашында өте ауыр жағдайда түскен едік. Дәрігерлер өткір жұқпалы ішек ауруы деген диагноз қойды. Баламның жасы бірде, оның іші өтіп қайта-қайта лоқси берді. Дәрігерлердің кәсібилігіне дән риза болдым, қазір кішкентайымның жағдайы бір қалыпты. Медбикелерге деген ерекше алғысымды білдіремін. Меніңше ғимаратқа расында да тез арада жөндеу жүргізген дұрыс. Бұл мәселеде медицина қызметкерлеріне кінә артуға болмайды. Өз басым оларға ризамын», — деді ол.

Ал облыстық көпбейінді балалар ауруханасының директоры Аманбек Жумировтың айтуынша, бір адамның пікірі көпшіліктің пікірін білдірмейді. Оның үстіне бұған дейін осы мәселені көтерген алматылық Динара Алдиярова өзінің медицина қызметкерлеріне ешқандай кінәрат-талабы жоқ екендігін, керісінше оларға алғысын білдіретінін жеткізген болатын. Тек бар мәселе бөлімшедегі тазалық жағдайы көңілінен шықпайтындығы туралы айтқандығын еске салды.

«Әрине, мәселе бар екендігі рас және біз оны жоққа шығара алмаймыз. Инфекциялық бөлімше өз алдына бір ғимарат, сонау 1981 жылы тұрғызылған. Мұнда күрделі жөндеу жұмыстары 2009 жылы жүргізілген. Осындағы жағдайды жақсарту мақсатында бірқатар шаралар қолға алынды. Өзіміздің мекеме есебінен бұған дейін косметикалық жөндеу жүргізілді. Алдағы уақытта күрделі жөндеу жүргізу үшін жобалық-сметалық құжаттама жасақталып, мемлекеттік сараптама сатысында екендігін айта кеткім келеді. Сәтін салса 2020 жылы күрделі жөндеу жасалады», — дейді ол.

Сонымен бірге балалар ауруханасының жұқпалы аурулар бөлімшесіне тікелей жолығу арқылы бір аурудан арыламын деп, екінші ауру жұқтыру қаупі бар екендігін дәрілерлер еске салады. Сол себепті алдымен учаскелік дәрігерге немесе жалпы тәжірибелік дәрігерге қаралған жөн, ал ауру асқынып ауруханада жатуға тура келсе ғана дәрігердің жолдамасымен жолыққан дұрыс. Оның үстіне қалалық емханалар таңертеңгі сағат 8-ден кешкі 20:00 дейін жұмыс жасайды. Егер тұрғындар балалар ауруханасына ағылуын азайтатын болса, бұл инфекциялық бөлімшенің жұмысын әлдеқайда жеңілдете түсер еді.