Ресей Душанбеге Ауғанстан тараптан қауіп төнсе, тегін қару-жарақ жеткізуге уәде берді
Ауғанстандағы жағдай Тәжікстанға қауіп төндірсе, Ресейдің 201-әскери базасы тәжік билігіне әскери көмек көрсетеді. Бұл туралы Ресейдің қорғаныс министрі Сергей Шойгу мәлімдеді.
«Мәскеу тәжік армиясын қару-жарақ және әскери техникамен тегін жабдықтауға дайын. Тәжікстан Ұжымдық қауіпсіздік жөніндегі шарт ұйымына (ҰҚШҰ) мүше және әскери одақ болғандықтан, оның аймақтық бүтіндігі мен қауіпсіздігін қорғау мәселесінде Мәскеу шетте қарап тұрмайды», — деді Шойгу.
Ол сонымен бірге орыс әскерлері Сирияда, Ливияда және Иракта соғысқан «Ислам мемлекеті» террористік ұйымның содырларының Ауғанстан аймағына белсенді түрде өтіп жатқанын жеткізді. Оның сөзінше, қазір Тәжікстан армиясының кәсіби дайындығын жоғарылатып, тәжірибесін арттыру бойынша іс-шаралар жүріп жатыр.
Шілде айының басында Тәжікстан ҰҚШҰ-ға Ауғанстанмен шекарасын күшейтуге көмек сұраған.
newstaraz.kz