Петропавлдағы медициналық колледж асханасында той өткізуді дәстүрге айналдырған шуға байланысты ешкім жазаланбапты.

Солтүстік Қазақстан облысы денсаулық сақтау басқармасы басшысының айтуынша, колледж директорынан бастап барлық қызметкер жұмыстарын жалғастырып жатыр.

Бұл туралы 31 арна хабарлайды.

Солтүстік Қазақстан медицина колледжінің асханасы нағыз тойханаға айналғанын колледж студенттері де, оқу орнының бірнеше қызметкері де айтқан болатын. Денсаулық сақтау басқармасының басшысы бейнежазбаларға қарамастан бұл жағдайды дәлелдеу мүмкін болмай отыр дейді. Сол себепті де аталмыш жағдайға қатысты ешкім  жазаланбағанын айтты.

Дегенмен жанжалдың ортасында қалған асхананың бұрынғы иелерімен жұмысты жалғастырмау туралы шешім қабылданыпты.  Сондықтан бір айға жуық уақыттан бері асхана жұмысының тоқтап тұрғанын жасырмады.

«Ол жерде екі рет қана ас беру өткізілген. Колледж қызметкерлері жақындарының. Ал асхана жұмысын жалғастыруға жуырда қайта тендер жүргізілді. Алдағы уақытта асхана қайта жұмыс істей бастайды», — дейді  СҚО денсаулық сақтау басқармасының басшысы Қабдрахман Сақтағанов.