Түркі мемлекеттері ұйымына төрағалық ету ісі Өзбекстанға көшеді
Түркі мемлекеттері ұйымының Самарқанда 10-11 қарашада өтетін саммитінде ұйымға төрағалық ету ісі Өзбекстанға ауысады.
Бұл туралы Өзбекстан сыртқы істер министрлігінің өкілі Рахматилла Нұрымбетов хабарлады.
Шенеуніктің айтуынша, саммиттің күн тәртібінде сауда қатынастарын дамыту, көлік пен кеден қызметіне қатысты істерді жеңілдету, қосымша көлік дәліздерін ұйымдастыру мәселелері талқыланады. Саммиттің қорытынды құжаты ретінде Самарқанд декларациясы қабылданады.
Түркия сыртқы істер министрі Мевлют Чавушоглу 29 қыркүйектегі саммитте Түркіменстан ұйымның толыққанды мүше болып қабылданатынын жариялаған. Бұл мәселенің Самарқандағы саммитте қаралар-қаралмасы әзірге белгісіз.
Түркі мемлекеттерінің ұйымы 2009 жылы Түркітілдес мемлекеттер әріптестігі кеңесі (Түркі кеңесі) ретінде құрылды. Оған Әзербайжан, Қазақстан, Қырғызстан және Түркия мүше болды.
Өзбекстан ұйымға мүше болу ниетін 2018 жылы мәлімдеп, 2019 жылы Бакудегі саммитте ұйымға қабылданды. Венгрия мен Түркіменстан ұйымға бақылаушы мәртебесіне ие.
newstaraz.kz