Жұмбақ өлім: Шымкенттегі пәтерлердің бірінен үш бала мен олардың әжесінің мәйіті табылды

Шымкенттегі көпқабатты үйлердің біріндегі пәтерден төрт бірдей адамның мәйіті табылды. Олардың үшеуі — кәмелет жасына толмаған балалар. Бұл туралы TVK арнасына сілтеме жасаған NUR.KZ хабарлайды.

Марқұмдардың денелері 10 желтоқсан күні Республика көшесіндегі №31 үйдің төртінші қабатынан табылған. Қайтыс болғандардың қатарында 4 жасар қыз бен 12 және 13 жастағы екі бала және олардың әжесі бар.

Алғаш болып дабылды көршілері қаққан көрінеді. Күнде ауладан көретін балалар біраз уақыт көзден таса болғандықтан оларға ең алдымен жаман ой келіпті. Артынша марқұмдардың туыстары да хабарсыз кеткен әжей мен оның немерелерін іздеп үйге келген. Алайда, есікті ешкім ашпапты.

Оқиға орнына дереу құтқарушылар жетіп, үй есігін бұзып кіргенде төрт бірдей адамның мәйітіне тап болған. Мамандардың айтуынша, төрт адам да шамамен 3 тәулік бұрын қайтыс болған.

Әзірге өлімнің нақты себебі анықталып жатыр. Алдын ала болжам бойынша, олар газдан уланып көз жұмған. Тергеу амалдары жүргізілуде.