Жемқорлық бойынша күдікке ілінген генерал-майордың денесі тергеу изоляторынан табылды
Жемқорлық бойынша күдікке ілінген генерал-майор Жайлаубек Халықұлының денесі тергеу изоляторынан табылды. Бұл жөнінде қылмыстық-атқару жүйесі комитетінің баспасөз қызметі хабарлады.
«Тергеліп қамалған Жайлаубек Халықұлының [денесін] шамамен сағат 7-де бекет бақылаушысы тапты. Мекеме кезекшісі дереу алғашқы медициналық көмек көрсетті. Алайда қабылданған шараларға қарамастан қамалушыны құтқару мүмкін болмады. Оқиға орнына келген жедел жәрдем бригадасы механикалық асфикция нәтижесінде туындаған өлімді тіркеді» деп жазылған комитет хабарламасында.
Ресми ақпаратқа қарағанда, оқиға орнына прокуратура, жедел тергеу тобы, облыстық қылмыстық-атқару жүйесі департаменті өкілдері келген. Тергеу изоляторындағы өзге қамалушылармен әңгіме жүргізілген.
Комитет «тексеру нәтижесінде күдіктіге қатысты заңға қайшы әрекет» анықталмағанын айтты. Қызметтік тексеріс тағайындалған.
Әр жылдары Алматы және Ақмола облысының полициясын басқарған 59 жастағы Жайлаубек Халықұлы биыл мамыр айында қамалған. Ол қылмыстық істі тоқтатқаны үшін пара алды деген күдікке ілінген.
newstaraz.kz