Жол апатына түскен Ернар Айдар әлі есін жиған жоқ (фото)

Оның айтуынша, оқиға 12 сәуір күні түнде Алматы-Шымкент тасжолында орын алған. Гастрольдік сапардан Алматыға қарай жол тартқан көлік жолда апатқа ұшыраған.

Ауа райының қолайсыздығы салдарынан көлік жүргізушісі тізгінге ие бола алмай, жолдан шығып кеткен.

Көлікте үш адам болған. Көлік жүргізушісі жеңіл-желпі жарақат алып, Ернар Айдардың ағасы әрі продюсерінің қабырғалары сынғанын айтты Жазира Еркін.

«Ернардың жағдайы бірқалыпты, әлі де ауыр халде. Омыртқасы сынған. Түнгі сағат екілердің шамасында болған. Қазіргі таңда сәуір айындағы жоспардың барлығын ысырып қойдық. Себебі, Ернардың жағдайы белгілі болмайынша, әлі ештеңе айта алмаймыз.

Аяққа тұрып кету-кетпеуі белгісіз. Қазір Алматы қаласындағы ауруханалардың бірінде жансақтау бөлімінде жатыр. Дәрігердің бақылауында. Әлі есін жиған жоқ«, — деп мәлімдеді ол.