Полиция 8-қабаттан құлап қайтыс болған бойжеткенге қатысты тың дерек жариялады

«Тілеугүл Қуанышты бір топ жігіт алып қашпаған. Ол жалғыз жігітпен өз еркімен көп қабатты тұрғын үйге барғаны бейнебақылауға түскен. Бойжеткеннің жігітпен әлеуметтік желіде бұрын да хат жазысқаны белгілі болды.

Қазіргі таңда қыздың өліміне қатысты Алатау аудандық ІІБ-да Қылмыстық кодекстің 105-бабы бойынша іс қозғалып, сот алды тергеу жұмыстары жүргізілуде. Тілеугүлмен бірге болған жігіт қазір полиция бөлімшесінде, түсінік беруде. Қыздың 8-қабаттан не үшін құлағаны тергеу біткен соң анықталады «,— деді баспасөз жетекшісі Салтанат Әзірбек.

Естеріңізге сала кетсек, кеше 19 жастағы бойжеткенді бір топ жігіт алып қашып, артынша қыздың өлі денесі мүрдеханадан табылғаны туралы ақпаратты NUR.KZ порталына оның туыстары хабарлаған болатын.

Туған-туыстарының хабарлауынша, бойжеткенді жерлеу рәсімі бүгін болмақ.