Тәжікстанда үш елдің сарбаздары қатысқан әскери жаттығу өтті
10 тамызда Ресейдің, Өзбекстанның және Тәжікстанның бірлескен әскери жаттығуы аяқталды. Ауған-тәжік шекарасынан 20 шақырым қашықта жайғасқан Тәжікстанның «Харб-Майдон» полигонындағы жаттығу 5 тамызда басталған.
Үш тарапты жаттығу кезінде қарулы топтарды жою, нысандарды қайтару және әуе бақылауы жүргізу бойынша машықтанған. Оған 2500-тен астам жауынгер, оның ішінде Ресейдің 1800, Өзбекстанның 200 және Тәжікстанның 500 әскері қатысқан. Бұдан бөлек 500-тей соғыс техникасы тартылған.
«Харб-Майдон» полигонындағы жаттығу Ауғанстандағы жағдайға байланысты өткен. Ресейдің бас штабының басшысы Валерий Герасимов Өзбекстан мен Тәжікстанға «аймақтағы жағдайды бақылау және террорлық қауіптің алдын алу» мақсатында қару беру көбейтілгенін мәлімдеді.
АҚШ президенті Ауғанстаннан америкалық әскерлер биыл 31 тамызға дейін толық шығарылатынын жариялаған. Осыған дейін «Талибан» қозғалысы Ауғанстанның бірнеше ауданын басып алды. Мыңнан астам ауған әскері мен бейбіт тұрғындар шетелге қашып жатыр.
newstaraz.kz