Тоқаев оқушыны зорлау оқиғасынан соң Тараз әкімін жұмыстан қуды
Қазақстан президенті Қасым-Жомарт Тоқаев Тараздағы мектептердің біріндегі дәретханада 12 жастағы қызды зорлау оқиғасынан кейін қала әкімі Қайрат Досаевты қызметінен босатуды бұйырды.
Тоқаев Twitter парақшасында Жамбыл облысының әкімі Асқар Мырзахметовке ескерту жасағанын да хабарлады.
Тоқаев твитінде «Досаев жұмысында жүйелі кемшіліктер жіберген» деп те жазды. Артынша Жамбыл облысының әкімдігі Досаевтың жұмыстан босатылғанын, оның орынбасары Бейсенбек Жанбосынов әкім міндетін уақытша атқаратынын хабарлады.
В связи с инцидентом в таразской школе, где пострадала 12-летняя ученица, и допущенные системные упущения в работе, поручил акиму Жамбылской области освободить от занимаемой должности акима г. Тараз. Акиму области объявляю замечание.
— Qasym-Jomart Toqayev (@TokayevKZ) November 21, 2019
Жамбыл облысының әкіміне Тараздағы 12 жастағы мектеп оқушысы зардап шеккен оқыс оқиғаға байланысты және жұмысында жүйелі кемшіліктер жібергені үшін Тараз қаласының әкімін қызметінен босатуды тапсырдым. Облыс әкіміне ескерту жасадым.
Қайрат Досаев Тараз қаласының әкімі болып биыл сәуірде тағайындалған.
Қараша айының ортасында Таразда ер адам мектептердің бірінде ауладағы дәретханаға сабақ кезінде сұранып шыққан 7-сынып оқушысын зорлаған. Бұл оқиғадан кейін мектептің бірнеше қызметкері жұмыстан қуылған. Полиция 38 жастағы ер адамның ұсталғанын, оның бұрын сотталғанын хабарлады.
newstaraz.kz