Украинада қаза болған тағы төрт тәжікстандықтың денесі еліне жеткізілді
Ресей абақтыларынан Украинадағы соғысқа жөнелтілген тағы төрт тәжікстандықтың өлімі расталды.
Таулы Бадахшан автоном облысындағы Ванж ауданының 49 жастағы тұрғыны Набимухаммад Бачгонов Украинада 20 қаңтарда қаза болған. Оның денесі еліне бір айдан кейін жеткізілді.
Туыстарының айтуынша, Бачгонов көп жыл Новосибирск қаласында тұрып, 2017 жылы заңсыз есірткі сату айыбымен 12 жылға сотталған. Оның орыс азаматтығы болған емес. Үш ай бұрын Иркутск қаласындағы абақтыдан соғысқа жөнелтілген.
Озоди радиосы өз бұлақтарына сүйеніп, бір апта бұрын Ванж ауданына Украинадағы соғыста қаза болған тағы бір тәжікстандықтың сүйегі жеткізілгенін хабарлады.
Екі апта бұрын Тәжікстанның Гиссар қаласында Украинада соғыста қаза болған 52 жастағы Фатхулло Нарзуллоев жерленген.
Озоди радиосы бүгінгі күнге дейін Украинада соғыста 14 тәжікстандықтың қаза болғанын анықтады. Ресми мәлімет бойынша Ресейде он мыңға жуық тәжік азаматы абақтыда отыр.
newstaraz.kz