Жантүршігерлік оқиға: Ақтөбелік тұрғын анасының көзінше әкесі мен інісін пышақтап өлтірген (видео)

Ақтөбеде болған жантүршігерлік қылмыстық оқиғаға қатысты сот тыңдалымы өтіп жатыр. Облыстың қылмыстық істер жөніндегі мамандандырылған ауданаралық сотында туған əкесі мен бауырын жауыздықпен өлтірген 39 жастағы ер адамның барлық əрекеті баяндалды деп хабарлайды өңірдегі NUR.KZ тілшісі.

Оқиға сəуір айында тіркелген. Түнгі сағат 23:00 уақытында үйіне ішімдік ішіп келген Медет Тапаев ұйықтап жатқан əйелін тұрғызып, тамақ дайындауды бұйырады. Əйелін балағаттап жатқанын естіген əкесі баласынан тыныштануын сұраған. Ішімдікті қоюын ескерткен. Өзіне дауыс көтерген əкесін Медет Тапаев балағаттап, қатты сөздер айтады.

Ашуланған əкесі баласын «енді мен сені асырамаймын» деп темір көсеумен ұрып, тəртіпке шақырмақ болған. Бұл əрекет баласын одан əрі ашуландырып, ас үй пышағын əкесіне бірнеше рет сұғып алған. Ауыр соққыдан əкесі оқиға орнында қаза болды. Үйде болған шудан келесі бөлмеде ұйықтап жатқан інісі оянып, дауға араласады. Ол жерде құлап жатқан əкесін пышақтап жатқан ағасын тоқтатпақ болып ұмтылған. Алайда ағасы пышақты көтеріп өзіне ұмтылғанда жатын бөлмесіне қашып, есікті жауып алған.

Өз ойын түбіне дейін жеткізуді ойлаған Медет Тапаев есікті бұзып кіріп, анасы, қарындасы мен інісінің балаларының көзінше оны пышақтап тастайды. Еденде қансырап жатқан інісін басынан тоқтаусыз ұрған.

Жантүршігерлік оқиғаны көзімен көрген айыпталушының анасы сотталушыны өмір бойына бас бостандығынан айыруды, өзінің əкесі мен бауырын өлтірген баласына кешірім бермеуін соттан жалынып сұрады.

Оқиғаға баға берген мемлекеттік айыпталушы сотталушының дүниесін тəркілеп, 23 жылға бас бостандығынан айыруды сұрады. Прокурор соттан Медет Тапеавты мəжбүрлі түрде емдеуге жіберу керектігін айтты.