Қырғызстан көрші елдердің энергетика министрлерін Тоқтоғұл су қоймасын көруге шақырды
Қырғызстанның энергетика министрлігі Қазақстан мен Өзбекстан энергетика министрлерін Тоқтоғұл су қоймасын көруге шақырды.
Бұл туралы қырғыз энергетика министрі Доскул Бекмурзаев 18 қаңтарда парламент комитетінің отырысында мәлімдеді.
«Біз Қазақстан мен Өзбекстанның энергетика министрлерін, су мекемелерінің басшыларын қаңтардың аяғында келуге шақырдық. Біз оларды Тоқтоғұл су қоймасына апарамыз, су деңгейін көрсетеміз. Біз оларға ұсыныс хат жолдап, бәсеке емес, әріптестік қажет екенін айттық», — деді министр.
18 қаңтардағы мәлімет бойынша, Тоқтоғұл су қоймасында 9,5 млрд текше метр су жатыр, тура бір жыл бұрын мұндағы су деңгейі 1,8 миллиард текше метрге көп болған.
Қырғызстан жыл сайын электр қуатын импорттайды. Бірақ биыл оны бірнеше елден сатып алуға мәжбүр болды. Жыл басында Бішкек электр қуатын Қазақстан мен Өзбекстаннан алды. Бұған қоса, Бішкек Тәжікстан мен Түркіменстаннан да электр қуатын тартты, енді Ресейден импорттау жолдарын қарастырып жатыр.
newstaraz.kz